نەورۆز

هەر جار باسی نوێ بوونەوە دەكرێت نەورۆز دەستی بەرز دەكات و دەڵێت دونیا چاوەڕوان بە با بتگۆڕم ، بەڵام چەندین ساڵە نە دونیامانی گۆڕاوە نە خۆمان ، نەورۆز بۆمان تەنیا بزەیەكە لە نێو دەستەیەكی هەڵپەڕكێ و لە دەوری ئاگرێكی زیندوو . . وتیان با ئەم نەورۆزە هەر چی خەمە لە بیر بەرین و بە بای دەین ، پێم بڵێ چەند نەورۆزی تر خەمەكان كۆتایی پێ دێت؟؟ پێم بڵێ چەند نەورۆزی تر ژمارەی باوكانی شەرمەسار لە منداڵە خشپیلانەكانیان لە بەر نەبوونی جەژنانە دەگاتە سفر ؟؟ پێم بڵێن چەند نەورۆزی تر  گڕی ئاگری نەورۆزمان ئاوێتەی ئەندامی كچێكی بێ نازی ئەم شارە   نابێت  تا لە نێوان بەڵێ بۆ باوك و برا و نە بۆ نەمان  ، سووتان هەڵبژێرێت؟؟ تەنانەت پێم بڵێ كام نەورۆز لەم وڵاتەم هیچ منداڵێك بە برسیەتی سەر نانێتە سەر باڵنجەكەی؟؟ ئەم پرسیارانە و هەزاران پرسیاری تر نازانم بۆ ناهێڵن دڵم نوێ بێتەوا ؟!....... نەورۆزتان پیرۆز
 

ڕۆژێكی تاڵ

خۆر وەك ڕۆژانی تر نەبوو ، بێ دڵ و بێ دەماخ لە سەر شارێكی زیندوو ئاوا بوو ، هەستی دەكرد ئەمڕۆش وەك ڕۆژانی ترە ، چاوی لە هەمووی شار بوو : منداڵێك و تۆپێكی فوتبۆڵ ، دایكێك ، بێشكەیەك  و لایەلایە ، دەس لە ملانێك لە نێو كۆڵانێكی چۆڵ ، هاوارێك بێدەنگ . هەمووی وەك ڕۆژانی تر بوون ، بەڵام ئاخ بۆ بزەیەكی ئەم خۆرە لووتنە ، دڵی گیرا بوو ، چاوی قونجاندبوو و گوێی بۆ لایەلایە دەگرت .خۆیشی نەیزانی چی بوو ، كتووپڕ دەنگێك هات و ڕایچڵەكاند ، چاوی كردەوە ، شارێكی دوكەڵاوی بینی ، نە منداڵەكە بینی نە تۆپەكەی ، نە دایكە دیار بوو نە بێشكەكەی ، تەنیا دەنگێك دەهات : 'ڕۆڵە گیان مەگری ، مەگرە بەهانە ، دایەت ماندووە ، بۆچ خەوت نایە ' . منداڵ و شار گوێیان بۆ قسەی دایك گرت و بێدەنگ بوون ،بەڵام چ بێدەنگیەك ، با دایە  گیان لێیان نەڕەنجێت ، دووكەڵ لاچوو ، خۆر مابوو و 5000 پەپوولەی نووستوو ، دڵی تۆقی ، هەستی كرد سەری لێ شێواوە و ڕۆژی ئەمڕۆ لە ڕۆژانی تر درێژتر بووە ، ویستی بڕوا ، مانگ نەیهێشت : مەڕۆ جارێك تا شەو زۆرمان ماوە ، بەڵام خۆر تەنیا ئەیویست بڕوات ، هەزاران جار بە تیشكی خۆی ڕووناكی بە لەشی مردووی بێ تاوانترین مرۆڤ دابوو ، هەزاران جار فر مێسكی دایكێكی جەرگ سووتاوی لە سەر گۆنای دایكە وشك كردبوو ، ئەمجاریش مرۆڤەكان بێ تاوانی بێ تاوان بوون  . بەڵام دایكە نەیدەتوانی فرمێسك بڕژێنێت ، یەكەم جار بوو خۆر لە ئاوا بوونی خۆی شەرمەسار بووبوو ، لە بەر ئەوەی بە گزنگی جوان و پڕشنگداری خۆی نەیتوانیبوو یارمەتی خەڵكێكی زكاو بدات .

شەویش هات بێ ئەوەی هیچ باوەشێك بێت بۆ چاوەڕوانی لە بەر ئەوەی هەموان چووبوونە باوەشی مەرگ . لەو شەوەدا ئەستێرەكان دەستەو ئەژنۆ بۆ زەوینی پڕپەژارەیان دەڕوانی ، دەتگوت ئەوانیش ئەمشەو ڕوناكیان كەم بووەتۆ ، مانگ بێ بەین فرمێسكی دەڕشت و لە گەل خۆی ئەمەی ئەگوت : ئاخۆ مرۆڤی ئەم سەردەمە بۆ وا بێ بەزەیین ؟  چاوانی سوور هەڵگەڕا بوو ، هەستی دەكرد ئەم شەو كۆتایی دونیایە ، لە ناكاو بیستی : دەنگی هەنسكە هەنسكی منداڵێك ، جیڕە جیڕی بێشكەیەك ، تەپە تەپی تۆپێك و لە كۆتاییش دەنگی ماچێكی سووك . لەو شەوە بێدەنگە گوڵەكان پۆرگەكانیان هێنا بوو تا خەڵكی شار لە باتی دەوا كەڵكی لێ وەرگرن و برینی لە دەست دانی كەسەكانیان لە بیر بەرن . مەلەكانیش باڵی یارمەتیان لێدا و بە فڕینەوە هاتن تا ماڵێكی تر بۆ ئەو خەڵكە بێ ماڵ و ئاوارەیە بكەنەوە ، ماڵێك لە گوڵ.   چەند چركە مابوو تا بەهار ، بەڵام ئەی سەوزەگەڵام تۆ هێشتا زیندوویت ، نە گەڵاڕێزانی پاییز نە ئەم زستانە سارد و سڕە نەیانتوانی هەڵت وەرێنن . با دونیایش بڵێت پاییز بۆ گەڵا ڕێزانە و زستان بۆ نه مان.

تەندیس

تەندیسێكیان ساز كرد  ، تەندیسی كچێك ، باڵا بەرزێكی چاو كاڵ .   كچە یان بردە ناو ژوورێك ، لەوێ تەندیسێكی تری بینی ، زۆر بێ دەماخ سەیری ئەمی دەكرد و هیچی نەدەگوت ، تا ماوەیەك .بەر بەیانێك دی ئەو تەندیسە نەماوە . لە گەل خۆی وتی  بڕیا ئەویان بۆ شوێنێكی تر بردبێت ،خۆی مابوو و ژوورەكەی ، هەستی دە كرد  جوانترین و ڕازاوەترین تەندیسی سەر گۆی زەمینە ، ڕۆژ و شەو نوێژی دەكرد و شوكرانە بژێری خودای خۆی بوو ، قژی كاڵی خۆی بە دەستە بەردینەكانی دائەهێنا و چاوەڕوانی خودایەك بوو  كە بێت و باس لە جوانی ئەم كچە بێ نازە كات ، دوای ماوەیەك چاوەڕوانی ، خودا  نەهات  ، بەڵام تەندیسێكی تری هەنارد بۆ ناو ژوورەكەی ، باڵا بەرزتر و زۆر جوانتر لە خۆی ،  لە یەك چاو تروسكاندن كچە ڕووخا ، دڵی شكا ، دونیای گۆڕا  ، هەر جار سەیری ئەو تەندیسی ترەی دەكرد چاوانی پڕ دەبوو لە فرمێسك ،بۆ چەند ڕۆژێك نە نوێژی كرد نە  جارێكیش قژی كاڵی خۆی داهانی ، دڵ گیراو سەیری ئەستێرە و ئاسمانی دەكرد ، بێ ئومێد و بێ ئامانج و بێ هەتاو .  نازانم چۆن بوو و چی ڕووی دا ،  هوجمیان بردە سەری دەست و لاقیان بەست و بردیان خستیانە نێو زبڵدانێكی گەورە    قەتیش نەیزانی گوناهی چی بوو و بۆ چی بێ هۆ خۆی و جەستەی كەوتنە نێو ئەو هەموو تەندیسە لەت لەت كراوە